Donnerstag, 18. Dezember 2008

Tom Herold Remix jetzt auch auf Punkrap.ch erhältlich


Tom Herold (10und64) von Lügner vs. The Unborn Chikken Voices jetzt auch erhältlich unter: http://www.punkrap.ch - Ziehs Dir rein ....

Samstag, 1. November 2008

Lügner im Germanistikmagazin der Universität Zürich


Ehm ... hat da jemand wirklich sinnvolle Zusammenhänge in meinen Lyrics entdeckt ? Vielleicht unter Mithilfe einer rassigen Sportzigarette oder nach drei vier Bier ? Naja ... fühle mich natürlich des allerheftigsten gebauchpinselt, dass sich das Germanistikmagazin der Universität Zürich meiner Wenigkeit angenommen hat. Beitrag lesen (pdf, 5,5Mb)


Dienstag, 28. Oktober 2008

Wuassaaaaaa 2008

Das waren noch Zeiten: Damals, als wir die Kassiererin in der Migros unsere MitarbeiterInnen und Cheffen, den Pöstler oder den Polizist ja sogar unsere Eltern jeweils mit einem lautstarken und ultralangen "Wuassaaaaaaaaaaaa" begrüsst haben. Natürlich waren wir uneingeschränkte Fans der Bud-Beer-Spots. Nun, die Hauptdarsteller der kultigen Werbe-Serie sind älter geworden und setzen sich nun für Ziele ein, die der Menschheit mehr bringen sollen als einen heftigen Kater danach. Dope !


Samstag, 25. Oktober 2008

Videoklipp "Tom Herold" (10und64 remix) am Start

Hey, Musik ist einfach zu gross um sich nur in den engen Grenzen eines einzigen Genres zu bewegen. Odr? Drum friss diesen Remix inkl. Videokklip. Aber Achtung: Epilepsie-Warnung vom schtruuben! Den Track hab ich bei einer Luzerner Rockband geklaut. Gut, so Gangsta gings auch wieder ned ab: Die Jungs von The Unborn Chikken Voices haben mich angefragt, ob ich für die letzte CD ihrer Album Trilogie auch nen Remix schräubeln würde. Selber schuld! Und weil ich in der Finanzkrise all meine Aktien verloren habe, mir darum die Frau davongelaufen ist (mit Hund und Kindern) und ich wieder angefangen habe zu trinken und in der Folge meinen Job verloren habe, hatte ich plötzlich grad bisschen Zeit um auch noch nen Videoclip zum Remix zu backen. Zum Kklipp sag ich nur soviel: Resolume rules !


Video in hoher Auflösung tschekken

Gut. Der Titelzusatz "10und64" ist verdammt einfallslos. Schliesslich tschekkt sofort jede Hundsniere, dass diese Kombination für "Tram und Bus" steht (Der 10er und der 64er sind meine Lieblings-öffentliche-Verkehrsmittel in meinem Hood hier in Zürich (Ja. Bleib mir weg mit deinem trendigen 32er-Hey-Total-urban-im-Kreis5-represent-Schwachsinn und setz Dich wieder an deinen G5 und mach den Flyer für deine Kollegin (die ihr eigenes Kleider-Design-Studio aufzieht und für die Vernissage der Winterkollektion "snowflake ill" noch eben so nen Flyer brauchst und Du machst ihr das Ding gratis, weil sie dann mit Dir hoffentlich mal ins Forum geht eins go ziehen (Du erhoffst Dir dann natürlich noch mehr aber Hey: Dazu reicht ein schäbiger Flyer niemals, ach fukk it ...) fertig - ich finde nach zwei Tagen, die Du schon dran rumgebastelt hast, sollte das Ding langsam fertig sein oder? - übrigens dieser Schwarz-Weiss-look mit dem gelben Datum drüber haben wir langsam gesehen) )) Und eben - ehm wo war ich - ah: Die Wendung "Tram und Bus" ist ja auch schon lange kein guter Witz mehr (das hat die alte mit der "snowflake ill"- Kollektion früher auf ihre selbstaufgenommenen Kassetten gekritzelt als dieser Sound noch "Jungle" hiess - Fukk war die visionär drauf - Junge, langsam verstehe ich, warum du scharf auf sie bist - aber heute ist ihr Vintage-flair längst nur noch show (heute hat sie einen weissen iPod ---uuuh)) - Ehm .. also eben: Drum eben "10und64", danke für eure Emails.

Freitag, 24. Oktober 2008

"Wie hast Du Dein Studio verkabelt ?"


... mit Kabel ?!? ... ehm ... Gut. Stellvertretend für die Mails die ich bezüglich der Studioverkabelung bekomme beantworte ich das Mail von Nik aus Zofingen. Klar, die Antworten sind eher allgemeiner Natur und gehen nicht auf Details ein und klären keine Ausnahmen aber vielleicht hilft Euch das trotzdem bei der Frage, was mit was verbunden wird um Sound zu bruzzeln. Noch zwei Punkte vorab:
1. Wie immer: Dies ist nur einer von 1000 Wege, wie man es machen könnte. Ich erhebe hier weder Anspruch auf Vollständigkeit noch auf Unfehlbarkeit.
2. Dieser Aufbau gilt für DAWs ohne analoge Mixer-Anbindung. It's all done in da machine.
3. Tschekkt dazu auch meine ausführlicheren Tutorials und Tips im Producerspecial auf www.luegner.ch

Von: Luegner
Datum: 22 Okt 2008, 23:03

Wow Nik ... das sind ja grad es paar Frage ... he he vorab han ich für Dich schnäll es Schema vo miim Studio zeichnet ... das findsch unter: http://www. luegner. ch/bmd_schematisch. jpg
und miini Antworet han ich da une diräkt nach diine Frage inegschribe ... Hoffe das hilft ...

----------------- Original Nachricht -----------------

Hey Lü,

I ha scho vell vo dine igehend erklärte usführige beträffend homeproduction uf aight und dinere website chöne lehre...mer schtelle sech jedoch paar froge, woni kei antwort fende druf...irgendwie nienets, be set sehr langem uf de suechi...drum wändi me a dech, i de hoffnig, du fendsch ziit, mer zhäufe.

Es goht eigentlech grundsätzlich um folgendes:

I ha es schtudio, bestehende us folgende komponänte: alesis i/o 2 interface, behringer truth 2030 monitore, behringer mic, FL Studio 8, Adobe Audition 3 und rächner (en neue, einzig förs musig mache konzipiert). I ha chli gschpaart und wet mis schtudio update und zwar met folgendem: genelec 8040, akg perception 420 mic, mackie control universal pro + extender.

Mini froge send folgendi:

1. Wördsch Du genelecs 8040 (du hesch die sälber, witer empfähle, au denne, wenn mer sgäld ned het för de sub(?

Voll easy ... de SUB isch totale Luxus. Di 8040er sind au ohni Sub super ... das isch aber au e Gschmacksfrag ... gang mit diinere Lieblings-CD in lade (zum Biischpil UP BEAT in Züri) und los Dir di verschidenen Monitore aa ... so als ganz schwammigi Richtgrössi chönnt mer villicht säge, das professionelli Monitore halt scho minimum en tuusiger pro Stuck choschtet ... und alles drunder isch eifach ehner Hobby-Züüg ... aber di 8040 findi Top ... zämme mit de ARC-Software chasch der scho fascht e Profi-Studio-Ablosi zämmebaschtle

2. Wie und för was setzt me eigentlech das mackie control i? Es set presets ha för adobe audition,oder?

S'Mackie isch einzig und alleige e Fernstüürig vo diinere Sequänzer-Software (bi mir Cubase, bi Dir Audition) also anstatt mit de Muus ufem Bildschirm umezmische, chammer da d'Fader aalange ... isch aber au ehner en Luxus ... ich bin au 10 Jahr ohni uuschoo ... usserdem isch sMackie grad no es Midi-Interface. Das ganze schlüsst mer mit eim USB Kabel am Compi aa.

3. Wo selli abmesche? I mache eigentlech all mini beats im FL Studio (be ke MC) und mache hauptsächlech beats, hüfig sengt aber mis mami the refrain etc...i mache all mini Beats im FL Studio 8, selli die dete abmesche oder is adobe audition öbernäh und dete abmesche (ha swaves mercury bundle kauft)? Wenn jo, müesst jo de beat is audition i enzelne spure (drums, strings, bass etc.) portiert wärd zum dete chöne abzmesche,oder? wie wördsch es du mache? nome wells geil usgseht, woti mer drum das mackie ned chaufe, sondern wet scho au en entsprächende nutze ha! ha ebe mini beats, bes jetz, im FL Studio scho "abgmescht", d.h. drums komprimiert, eq, filter und effects a de samples i einzelne channels etc...

Da gits eigentlich kei Reglä. Und ich mach au beides: Mängisch glingt mer en Mix im FruityLoops grad so guet, dass ich en eifach als Stereofile userächne und grad so benütze ... mängisch exportier ich aber au alli Spuure einzeln usem Fruity use und misch de ganzi Scheiss im Cubase. Je nach dem was ich will mache ... so oder so lande ich aber im Cubase ... will deetä ja dänn no de Rap und d'Scratches und alles uufgnoo werded ... aber ebe ... villi lüüt säged, mer söll immer alii spuure userächne und dänn nomal im Cubase oder so neu mische ... vo wäge qualität und so ... aber ich mach das halt grad wies mir passt ... ich han scho oft en Mix im Fruity gmacht, wo ich im Cubase versuecht han besser zmach ... was aber nöd glunge isch und ich han dänn de Fruity-Mix benutzt ...

4. I ha kei ahnig, wie alli hardwarekomponänte gschalte wärde, d.h. i ha vo monitor controller ghört und wörd gärn wösse wies gschalte werd (ned öbs guet dönt, so wie i allne tescht brechte). I fende bei keine vo dene monitorcontrollers en usb, midi o. firewire aschluss, wie wärde die verbonde? diräkt a dsoundcharte? dsoundcharte, mini alesis i/o 2 het en volume-regler woni dlutsärki scho cha i schtelle und dboxe sälber jo au und sogar im FL Studio sälber chani dlutschterki reduziere oder uedräie, werom auso en monitorcontroller? Vorauem isch es doch es, dass de beat bzw. de mix uf cd brönnt so lut dönt, wie i ne im FL Studio bem master igschtellt ha, oder? Auso wenni vo dete met de volle usschtürig uf mins audiointerface chume, vo dete weder met em volle pegel uf de monitorcontroller muess jo da am schluss förchterlech töne!!!

(siehe miis Schema) also eigentlich isches genau so: Ich gang mitem volle Pegel vom Master Out vo miinere Charte uf de Monitorcontroller - de hät kei USB - will das sind nurno Audio-Verbindige (XLR Kabel) - will das eigentlich nur en Monitorverteiler isch, wo mer iidstellt uf wellne Boxe mer wett lose und d'Luutsterchi regle chann. Bim Mische im Computer versuecht mer ja immer de volli Pegel zfahre, ohni dass mer in roote Bereich chunnt. Aber lose tuet mer ja nie im Volle Pegel ... also d'Mixluutsterchi hät nüt mit de Hör-Luutsterchi ztue. Ich han dadefür e Presonus Central Station. Und deetä sind dänn au alli Boxe und Chopfhörer aagschlosse - Das Ding isch also nur zum Lose.

5. Welli soundcharte bruchi, do helft eifach nüt...werom en pci (uad-1 oder so)? usb, hani jo jetz, schpelle kei live inschtrumänt i, ussert das mis mic dran agschlosse isch (audio interface het phantomschpissig), auso werom isch die ned guet oder werom gschiter firewire? I wörd för en soundcharte, egal öb firewire, pci, oder usb ca. fr. 500 usgäh, setts keni si, met phantomschpissig, chönti au no för en mic preamp (wo wörd de dä agschlosse? au a saudio interface?) ca. fr. 500 loh lige...was chasch mer du empfähle (ha persönlech a m-audio profire 610 dänkt)? Wie funktioniert smic (met preamp oder ohni über audiointerface met phantomschpissig) met däm monitor controller beträffend latänz, direct monitoring etc.?

(Du gseesch wie ichs verkablet han ... Mik diräkt in Preamp und vo deet in Komprässer und dänn id Soundcharte (aka Wandler)). Du muesch aber eigetlich kein neue Wandler haa ... PreAmp und Komprässer sind natürlich geil, wämmers sich chan leischte (muess au nöd so tüürs züüg sii wie ich hüt han) aber ich han früener au voll ohni gschaffed: Eifach Mik uf de Preamp vo miinere Soundcharte und de Rescht im Kompi gmacht. Und wänn Du suscht kei Inputs oder effektgrät usserhalb vom Compi häsch, dänn langed diin Stereo-Out, wo Du uf e Monitorcontroller chasch verkable.

6. Wenn i das mackie met extender set chaufe, was i werde, sofärn i en entsprächende nutze ha, wo über midi agschlosse werd, denne brüchti auerdings en soundcharte wo i midi inputs het, so dass es för de mackie controller und extender wörd länge, oder werd smackie diräkt a rächner agschlosse?

Das Mackie chasch diräkt per USB aahänke und isch sälber auno es Midiinterface ... ich han deet au miis Keyboard und miis Digitale Schlagzüüg draaghänkt ... aber ebe ... das Ding isch hertischte Luxus ... miini Prioritätelischte würd so uusgsee
1. es guets Monitoring (Boxe und Monitorcontroller)
2. es guets Mik (für en Rapper natürli sehr wichtig, für Producer ehner weniger ussert DU wetsch anderi Lüüt ufnee)

3. e guets Audio-Interface (bi mir hützutags es MOTU 896HD, aber mer bruucht nöd unbedingt 8 in und 8 outs ... diini Charte isch au scho voll easy - d'Soundqualität, vo allem i de Bäss isch halt bi besserem Wandler no vill heftiger)

3b. Gueti Kabel (Sehr wichtig !) am beschtä alles NEUTRIK und am beschtä alles XLR und am beschtä kei Chinch-Kabel

4. en guete PreAmp (wahlwiis grad mit integriertem Komprässer)

5. en guete Komprässer

6. Es ARC (Advanced Room Correction)

7. Es zweits Monitorpaar (Wo explizit schlcähti Qualität isch zB Avatone Mixcube)
8. es Mackie Control


Du gseesch ... es git hundert Sache, wo mer voreme Mackie bruucht ...he he (Bi mir isches übrigens rund 8 Jahr gange bis ich vo Priorität 1 bis Priorität 8 aachoo bin)

7. Wie hesch du alles verbonde? wo schtellsch denn du dlutschtärchi i? was isch denne a dim audio interface agschlosse? I chamer eifach au gar ned vorschtelle, wie z.B. die analoge grät selle funktioniere im zämmehang metere DAW? i meine signal goht jo vom computer uf dsoundcharte, vo dete z.B. dör en analog komprässer und denne uf abhöre, oder? aso wenni jetzt aber eifach de träck uf cd brönne isch es doch ned uf de cd döre analog komprässer komprimiert ussert i lose die cd haut weder uf mine boxe, wo signal döre analog komprässer gschlouft werd oder? i verschoth da eifach ergendwie ned (schad het kei schautzeichnig vo dim neue schtudio uf dinere site, dä wär no cool). Bemene mic chegg is wemer en komprässer de zwüsche hänkt...dete werd signal vom mic komprimiert bevors uf e kompi bzw. uf dabhöre chunt, drum chanis dete verschtoh aber de anderwäg eifach ned...

Hanni scho wiitgehend beantwortet und de rescht gseesch uf miim Schema .. villicht no das: Effektgrät wie zB en externe Komprässer, die werdet "iigschlauft" das bedüütet: Mer schickt en Teil vom Mix über es paar Uusgäng vom Wandler (nöd de Main-Mix sondern ebe zB Kanal 3 und 4) uf de Komprässer und nimmt das Signal wo bim Komprässer usechunnt wieder über de Wandler (zB Iigang 5 un 6) wieder zrugg in Compi. Deet nimmt mer de kompriimierti aateil wieder uuf. De Komprässer hänkt mer NIE zwüsched uusgang und Monitoring .. das macht, wie du sälber scho aagmerkt häsch, gar kei Sinn.

8. Wenni en mic preamp ha und en monitor controller, bruchi de am audio interface no umezschrüble, oder chanis einisch igschtellt loh si und peguänderige öber de preamp und monitor controller vornäh?

genau. wänn s'Audio-interface mal suuber iigschtellt isch, muesch es eigentlich nümm aalange. s'Signal wo inegaht kontrolliersch am Preamp und was usegaht über de Monitor-Controller ...

Musiziere, blibt för mech es hobby, woni unheimlech freud drane ha, aber i wot ned, dass öbbis schlächt dönt, well dharware schuld isch, sondern nur denne, wenni säuber tschoud be...i weiss, es isch ned sequipment, sonder the man behind it und i de sound woni mache uf mim obgnannte equipment isch eigentlech ok sowit, aber haut noni da woni gsuecht ha....i weiss lü, chli vell froge und es isch au ok, wenn ke ziit fendsch zrogg zschribe oder so, aber wenn denne danki der uf jedefau scho mou im vorus mega! vellech jo au interessant för saight forum...

--- VIllicht no allgemein (häsch DU aber ja scho sälber aagmerkt): Es isch en Irrtum zglaube, das guets Equippment gueti Musig macht. sEquippment isch nur s'Werchzüüg - und wer schlächts Equippment guet bediene chann, de macht villicht sogar bessere Sound als öppert wo guets Equipp gar nöd verstaat oder bediene chann ... das bedüütet: Mer sött immer das Equipment haa, wo a de Fähigkeite aapasst isch. Das Equipp chann dänn au mit eim wachse - Du häsch kein Stress - Du chasch der schön ziit laa ... das Jahr mal es paar geili Böxli - nögscht Jahr mal es geils Mik usw. Ich han früener mitere 8bit-Monosoundcharte miini erschti Platte gmacht (hät natürlich schrecklich töönt) aber ich hett mite besserem Equipp gar nöd chönne umgaa ... mit de Ziit und mit de Erfahrig chunnt dänn plötzlich de Punkt, wo diä Boxe, wo bis jetzt immer guet tönt händ plötzlich nümm langed und dänn isch au de Ziitpunkt zum neui chaufe.
Vill vo miine Homie vergässed bim sueche vo immer no besserem Equippment s'wichtigschte überhaupt:Musig mache ! Und wer weiss .. villicht will imene Jahr gar niemert me Musig lose wo super clean und professionell tönt und alli inkl. Du flüüged nurno uf SOund, wo useme verchätschete Audio Interface vo 1980 usetröpflet ...he he


Heb SOrg und bliib dra ... !!


liebe gruess N!K, Zofingen / AG

Donnerstag, 23. Oktober 2008

LIVE-MIKROFON RICHTIG HALTEN ...









... dann klappt's auch mit der Soundqualität und
ohne Feedback.

De Bandit und ich händ eus geschter bim Freestayle-Battle der
Kantone köschtlich amüsiert, wie gwüssi Lüüt zwar gueti MCs sind
aber ihres Werchzüüg, also sMikrofon, völlig falsch hebed ... und
sich dänn fröged, warum mer nüüt verstaat oder dasses immer wieder
feedback-pfiife git (woruf de mix-engineer natürlich sMik uf de
Monitorä liisliger macht ... woruf de MC wieder lüüter schreie muess
und sich am nächschte morge frögt warum er so heiser isch.

Es isch nämmlich zimmlich eifach uf ein Blick de Afänger vomene Profi
z'unterscheide nur scho wämmer gseet, wie er sMik hebed ...

Und yo: So sprüch vo wäge «de Method Man hebed sMik au eso», dänn mussi
eifach säge «dänn hätt de Meth au kei Ahnig wie mer es Mik richtig
hebed» ... probiereds uus und ihr werdet sälber merke, dass es besser
tönt und wenige feedbackt.

Das mitem Mikrofon isch wie miteme Hammer.... wieso hätt en Hammer
en Stil? Damit mer en am Stil hebe chann ...he he ... also so lax uusdruckt ...

Es Mikrofon hätt en Stil, damit mer das Mik au deet dra hebed.

Wänn mer nämmlich s'Mik am Chorb vorne hebed, dänn veränderet
mer de Frequänzgang so ungönschtig, dass genau die Frequänze, wo
es feedback erzüüged verstärk werdet (Rote Chreis - Grafik obe).
Es Mikrofon isch so baut, das de Chorb nöd aaglangt werde muess
... Das gseeht villicht nöd eso cool uus, tönt defür guet.
Es git kein einzige professionelle Sänger, Räpper oder Redner, wo
mit de Hand nur scho de Popschutz-Chranz berüert ... di wüssed
nämmli scho warum ...

Wänn mer also de Chorb zuehebet, dänn veränderet mer einersits
de Frequänzgang vom Mik und anderesiits chas bi Funkmikrofon
passiere, dass mer dFunküberträgig verschlächteret. Mikrofon,
wo keis Antänne-schwänzli unedraa händ, diä händ d'Antänne
meischtens üfem "Aquator" vom Poppschutz-Chorb ... und wänn mer
de mite de Hand abdeckt .... tja .. dänn gits villicht überträgigs-
fähler.

Im übige isch de perfekti Abstand zum driiräppe öppe 1 bis 2
fingerbreit zwüsched Lippe und Chorb. Di meischte hebed de Chorb
diräkt ad Lippe - das isch agr nöd so schlimm - aber wänn mer es bitzli
wiiter wäghebed, dänn chann sich de Schall no es bitzli besser
entfalte und de Fequänzgang verbesseret sich Und: dMembran vom Mik wird
nöd überforderet, vom Schalldruck ...schliesslich schreit mer de Kolleg
au nöd mit de Lippe am Ohr aa ...

Also: Mik am Stiil hebe, und 2-4 cm Abstand zum chorb !!

No en Hiiwiis für de Sound-check: am beschte mer git bim
soundcheck nöd grad vollgas - und versuecht sowieso immer
öppe di gliich Luutstärchi bim rappe zhaa - wänn mer also
zwüsched de Lieder rüeft «Sinder no zwäg» oder so, dänn
muess sMikrofon sofort wiiter wäg vom Muul ...
Wänn mer das nöd macht, dänn hätt de Mischer am Pult en z'höche
iigangspegel und reglet diis Mikrofon zrugg ... dadurch
bisch du wieder liisliger uf de Monitore und Boxxe und
schreisch dadurch lüüter is Mik, damit Dich ghörsch ... dänn
wirsch wieder liisliger greglet ...und so wiiter ... de Kampf
gwünnt i de Regel de Mischer ...he he

Au das chammer bi professionelle Sänger, Redner und au Räpper
beobachte: Wänn sie lüüter werdet, nämmeds sMikrofon wiiter wäg
und bi de liislige Parts isch sMik ganz nööch am Muul.

Und ebe: de Aafangs oder Grundpegel setzt mer bim
Sound-check fescht .. und normalerwiis wird mer währed em
Konzert nurno zrugg-greglet und sälte lüüter gmacht.

No öppis .... wämmer amigs cool am Bühnerand hin und herlauft
während diin Partner siin Rappart kikkt, dänn au deetä
druf achte - sogar wänn nöd am Reime bisch - dass Du sMik
am Stiil hebsch ohni de Chorb zuezhebe und vor allem druf
achte, dass du sMIK nie, nie, nie in richtig Monitorboxxe hebsch.

Das passiert ebe no gern, wänn mer nöd am räppe isch und sMik
eifach so i de Hand hät.

Da no di detaillierti Abhandlig uf Änglisch:
http://www.mipro.com.tw/teach_info/e/how_to_hold.asp

Also nomal Homes: Wömmer sMik richtig hebed, dänn gsehts villicht
nöd so cool uus, aber defür überzüügt mer mit klar verschtöndliche
Reims und das isch doch sWichtige. Und jede gseet sofort, ob Du
schomal es Mik i de Hand ghaa häsch, ode ob Du eifach zvill VIVA
gluegt häsch und bi de Rapper abglueget häsch, wie mer sMikrofon
FALSCH hebed ... obwohls deet ja sowieso kei Rolle spillt, will
ja eh alles PLAYBACK isch ....

ENTA DA STAGE !